مربعات شاعرية على عجلات القطار بين شاعرين من عمالقة المربع حسن مغازي وعبد الناصر لبيب

د مغازي

عبد الناصر لبيب

القاهرة-سويفت نيوز:

فى سفرته بالقطار من(قنا)إلى القاهرة يوم الأحد، ليلة الاثنين، 26 ديسمبر 2016، كان لموسيقار الشعر وشيخ النحاة الدكتور حسن مغازي الأستاذ بجامعة جنوب الوادي لقاء مؤنس مع فنان المربع الراقى الحاج عبد الناصر لبيب

وابتدر لبيبٌ مغازياً بالشعر، فأجابه الأخير على قافيته، ومن لحظته، وهكذا يبدأالأول،ويجيبه الثاني على قافيته، ومن ابن اللحظة، فكانت سهرة ممتعة، وإليكم  اللوحة الشعرية الأخاذة بين الشاعرين العمالقين في هذه السطور:
لبيب:
ياك العواذل بنوا سوار / فـ ودك بنينا وعلينا
تسمعشى مرة بنى سوار / آصيل يا غالى علينا
مغازي:
تعبوا العواذل بـ(نسوار) / لما الغالين رجعوا لينا
مساكم ده أغلى من(اسوار) / يا غالى ده متعة لينا
لبيب:
الله يعزك أيا خال / فى الحب طالق حصانك
فارس وفى الود خيال / الحب صانى وصانك
مغازي:
غربلت ناسى بمنخال / تقلع ليه قومصانك
قالع ولابس دوام خال / فى فرحتك وفـ هيصانك
لبيب:
خليك يا عمى فـ قطارك / توصل بأمن وسلامة
بالود قلبى وطار لك / نرجو من الله السلامة
مغازي:
محطات لينا ومطار لك / كله من الله علامة
آدى غدانا وفطار لك / يا رب نرفع ملامة
لبيب:
فى الفن ليكم محطات / والقول عندك أصوله
بحر يا عمى ومحيطات / ما يوم انا اقدر أطوله
مغازي:
مشيتنا ليكم بنطات / تقرا الكتاب من فصوله
واوكم مربع ومطاط / لما تقوله يلزم حصوله
لبيب:
فى الفن فارد قلاعين / نكتب لذوقك قصيدة
تطلب يا عمى قلع عين / فنان وعارف تصيده
مغازي:
للمشية لازم قلاعين / للزول تقول لك رصيده
بدل الدلع ليك دلاعين / الفن ده إنت سيده
لبيب:
خدنى يا عمى أمل ليك / فى الفن قوال ودارس
أستاذى آنا أمليك / فى الفن فاتح مدارس
مغازي:
فارس مربع وماليك / الكل عندك جه دارس
دعواتى ربى يخليك / واحشنى من شهر مارس
لبيب:
الفن إسنا ومغازى / ربك كريم هو حارس
دايما بدورك باغازى / شغال من شهر مارس
مغازي:
اليوم نحاول نجازى / حران فى شهر مارس
يا صقر للفن بازى / الكل بعدك جه خارس
لبيب:
الفن إسنا ونقادة / محلاك فـ لبس الخلايق
فى القلب جوه نقاه ده / من بين عموم الخلايق
مغازي:
فنان وخياط عقادة / الجسم نتر الخلايق
صحى لى كل الرقادة / خلى الجميع يصحى فايق
لبيب:
الفن ده له مقامه / قول وأستاذ وشاكله
الكل يحفظ مقامه / قاعد تحل فـ مشاكله
مغازي:
يا جيلى لى الكل قاموا / نجنى النفون قبل شتله
للفن عدوا رقامه / حتى البنات وشوشت له
لبيب:
من اسنا لغاية المعادى / الكلمة عندك وجيزة
لساى أوانى ومعادى / باشرب لى يا خلق جوزة
مغازي:
مين اللى يقدر يعادى / الشعر ولا الرجيزة
فى القومة ولا فـ قعادى / القولى عندى وجيزة
لبيب:
الفن يا عمى ليك ليك / القولة عندك وجيزة
الشعر اهو من دلك ليك / ما يسوى قولى بريزة
مغازي:
قلت انا ده أولك ليك / الفن محتاج ركيزة
لازم أقوم لك دلك ليك / قيمتك دى عندى عزيزة
لبيب:
حدت انا فنك ركيزة / ساند عليه السبايت
الكلمة منك وجيزة / والفن عندك جه بايت
مغازي:
الكلمة منك عزيزة / والنخلة جابت صبايط
نغمك لوسطى هزيزة / رقصنى اهو لسة بايت
لبيب:
فنك كخمر بيسكر / يادى الطعامة يا سيدى
ما تقولشى يا عمى سكر / ولا حلاوة الرشيدى
مغازي:
وجهك منور مسكر / خلانى أقطع وريدى
من كاس اريّم وأسكر / فنك مرباى على ايدى
لبيب:
حبك شربته ملا الدن / أستاذ وفنك فريدى
القلب ليكم عشق حن / عشانك أنا اقطع وريدى
مغازي:
يا عيشنا لازم تلدن / فى الفرن ح احمى جريدى
للضهر لما يأدن / ونفت منه فـ ثريدى
لبيب:
توصل يا عمى بسلامات / خاطرك أخدها جرى دى
القلب بعدك سلا ومات / والدم وقّف وريدى
مغازي:
يا رب تمنع ملامات / فكرى توغوش شريدى
تكرم لى هذا الزلامات / نتغدى عنده ثريدى
لبيب:
عشانك جه قلبى جنهتان / وانا اقول لنفسى تريدى
ادفع ياعمى جنيه تان / شوفك ده رح يبقى عيدى
مغازي:
باجرى وراكم ونهتان / الفن منكم فريدى
ما تجيشى نرجع نقول تان ؟ / هايم وقلبك مريدى
لبيب:
باجرى وانا قلبى نهتان / عرقى يبل الجريدى
تعطى لى حبك أقول تان / هايم فى عشقك مريدى
مغازي:
القلب رفرف وناح تان / الدم طقطق وريدى
من فوقى ولّع وتحتان / خلانى ابعتر بريدى
لبيب:
القول ده فنى بالاكبار / الواو ده قطّع وريدى
وصغارنا يا عمى وكبار / عشانك رح ارسل بريدى
مغازي:
حاسس قعادى على البار / سكران باطفطف شريدى
متعشى فشة ومنبار / متغدى فتة ثريدى
لبيب:
حاسس وقاعد على البار / أعدل فـ مخى العنيدى
تلميذك انا وليك بار / دايما أقول لك فريدى
مغازي:
أنا اللى زمانى علىْ جار / خلانى مشىى تئيدى
طوبى باكسّر وأحجار / رجلَىّ تعبت وإيدى
لبيب أراد إنهاء الجلسة قائلا:
خلاص يا عمنا، نتمنى لك السلامة فى الحل والترحال، اللهم هون عليه سفره هذا واطو عنه بعده.
فابتدره مغازي قائلا:
الفن بالمتر وشبار / فرفطنى والدور ضنانى
عايق ودايما راجل بار / م الفن تملا قنانى
لبيب:
الفن ده متر وشبار / ربك عليم بالخلايق
أستاذ يا عمى وراجل بار / تشهد عموم الخلايق
مغازي:
الفن جوة ومش بار / علّمنا كل الخلايق
زرعناه جوة وكلع بار / خلى حريمها طلايق
لبيب:
زرعنا فـ ودك طلع بار / محطط سرايب سرايب
نفسى أنا اسكن أكون جار / تاخدنى بين القرايب
مغازي:
الزرع مش عند نجار / والحلب يقلب لى رايب
الزرع شتلة وأشجار / الفقر ولى هرايب
لبيب:
حبك ده أمتار ولا اشبار ؟ / أقيسها واعد الخطاوى
يا عمى ليكم أنا بار / عاشق لفنك وغاوى
مغازي:
حبك يحَلّى لى صبّار / تحلى لى منه التقاوى
واكتب لى منه بأحبار / أنقّى كلامى نقاوى
لبيب:
أنا لفنى دارس وما حمار / وف قولى طالق لسانى
الفن غارسه بأشجار / فى قولى عمى وصانى
مغازي:
فنك يدغدغ لى أحجار / علّم لى قول الرصانى
بالكلمة تطرح لى أشجار / ما يوم فنى عصانى
لبيب:
قولك يا عمى نقاوى / ناشر لى فنك فـ الاخبار
الود قولك أغانى / فنان بتعزف على اوتار
مغازي:
فنك ده علّا مكانى / أهرامها قالت وأخبار
والقلب يشبه ميكانى / فى اللحظة بيزيدنى أشبار
لبيب:
الفن  شجرك وجانى / اعزف معانا على اوتار
طارح لى قولك مجانى / والتمر دانى من اشجار
مغازي:
بالراحة تجرم يا جانى / ما تقولشى ليك عندنا تار
ده القلب رفرف رجانى / قال آه يا رمشه يا بتار
لبيب:
فى الفن ما اقدر أجاريك / إنت اللى قولك نقاوى
فاتح يا عمى مجاريك / منكم أخدنا التقاوى
مغازي:
طيب حسبتك أتاريك / ما تقولشى جن ومخاوى
واحنا جسومنا متاريك / العضم خوّخ وخاوى
لبيب:
فى الفن رافع مداريك / والجو هفهف طيابه
فى القول ما اقدرشى اجاريك / القمح كرمه فـ طيابه
مغازي:
عارفك يا فنان وداريك / بتسوق علينا الطيابة
فى الحضن واخدك باداريك / يؤذيك هوانا وطيابه
لبيب:
فى الفن دارس ودكتور / أستاذ وفى العلم جامعة
القمح حمصص فى هاتور / والليلة يا عمى جامعة
مغازي:
إنت اللى فنان وذاك تور / ليك كلمة للفن جامعة
فى كياح وطوبة وهاتور / للفن نورت شمعة
لبيب:
للفن دارس ودكتور / جوك مرفرف طيابه
بنزرع يا عمى على البور / والفن عندك نيابة
مغازي:
قوم هات لى ودك وقوم تور / ورينا فن الربابة
دايما مفطفط ومنتور / للفن أصله وربابه
لبيب:
قولك يا عمى ده عناب / والفن عندك بصارة
وفـ قولى تقرط لى ع الناب / وفـ واوى ليك الشطارة
مغازي:
وسط الشوارع وجناب / فى الفن ليك البصارة
بتلومنى دايما وأنّاب / خليتنى أفطر بصارة
لبيب:
خلى فطارك بجلاب / بالاش منها البصارة
فى الفن تارب وجلاب / البعد عنكم خسارة
مغازي:
فى النجع بيبيعوا جلاب / المسلمين والنصارى
بيقولوا للخير ده جلاب / ما ندرى إيش اللى صارا
لبيب:
فى النجع بيبيعوا جلاب / مرصوص فى وسط المقاطف
الحب يا عمى جلاب / فـ ثماره أجنى واقاطف
مغازي:
فى العلم عندينا طلاب / الورد منهم جه قاطف
فى الفون بنكتب وفى اللاب / يا رب ندعيك تلاطف
لبيب:
قوال انا وقولى ع الكد / باكتب فـ فنى بإيدى
عايش حياتى على الكد / ومعاكم آخد وأدى
مغازي:
إنت اللى فنان كلام جد / ع الكل دايما تعدى
فنك دوانا اللى ينجد / وصانى جدك وجدى
لبيب:
أنا لفنى ده باعرف الجد / عارف أصولى فـ كلامى
وارثه من الأب والجد / ولا يوم اخدته بعلامى
مغازي:
اسمع لى منى كلام جد / يشفى لى منى ألامى
ستى اللى قالت مع الجد / هى اللى شيخى وإمامى
لبيب:
الفن قوله حدانا / إحنا اللى خاله وعمه
والرب يكرم حدانا / إحنا اللى ولا حد همه
مغازي:
بنصيد حمامنا وحدانا / لبّسنا للدنيا عمة
للكون غنانا وحدانا / للكل خالة وعمة
لبيب:
أقول لك تصبح على خير يا دكتور ، سعدنا بالوقت الممتع الجميل معاك.
مغازي:
تصبح على واو وفرحان / العقل يوزن فنونك
دايما أنا فيك سرحان / تصبح على خير ظنونك
لبيب:
الفرح رح يبقى فرحان / دايما ح يعزف قانونك
العقل طاير وسرحان / دكتور وبادرس قانونك