صحة
كيف تتقي درجة الحرارة العالية جدا في نهار رمضان؟
اختارتها لكم/ سمية الشريف:
هذه مجموعة نصائح مهمه جدا انقلها لكم على لسان صاحبها الذي سجلها كخواطر تحذيرية تدلنا على كيفة اتقاء درجة الحرارة العالية جدا خاصة في نهار رمضات يقول :
طالما ان درجة الحرارة طوال ايام الاسبوع الجاي هاتكون حوالي ٤٠ مئوية زي الارصاد ما بتقول اذن اسمحوا لي حضراتكم افكركم بشوية حاجات بسيطة ..
اولها ان شمسية اليد تعتبر وسيلة ممتازة للحماية من الشمس اثناء النهار وبفكر حضراتكم انه مش عيب ابدا اني امسكها في ايدي وانا ماشي وكمان هي اسمها ” شمسية ” ومحدش سماها مطرية مثلا علشان بتحمي من المطر بالعكس هي اساسا معمولة للحماية من الشمس علشان كدة سموها شمسية
ثانيا مين قال ان لبس الاسود والغوامق بالنهار شياكة ولا دليل علي القوة والعظمة مثلا وان لبس الملابس البيضاء عيب ولا يكسف لا سمح الله ؟
بالعكس الملابس البيضاء الخفيفة مهمة وجميلة وبتمنع احتفاظ الجسم بالحرارة وتحمي الجلد من الأمراض عكس الاسود والغامق بصفه عامة بيحتفظ بالحرارة ويسخن الجسم ويزود العرق ويعمل مشاكل جلدية ثالثا بلاش حكاية نبقي راجعين من برة وكلنا عرق والهدوم غرقانة مية ونروح قاعدين قدام المروحة ولا جنب التكييف وبعد كدة نرجع نعطس ونكح ونسخن وناخد دور البرد بتاع الصيف السخيف
رابعا كمان بلاش حكاية شرب شاي وقهوة من المغرب للفجر وننسي شرب المياه ونعتبر ان الشاي سوائل !! لا طبعا لازم كباية مية كل ساعة من المغرب ولغاية الفجر علشان نحافظ علي الجلد والكلي
خامسا يا ريت نخف قوي من الحلويات الشرقية اللي بتسخن الجسم وخلينا احسن في البطيخ والكانتالوب القمار الجميلة اللي بترطب …
حاجات كثير ممكن نعملها وحاجات تانية غلط بلاش نعملها علشان ما نتعرضش لمشاكل في ايام الحر .. ياريت نخللي بالنا الايام الجاية باذن الله.
