بالعامي الفصيح.. ” التيس” جعلني وزوجي كالمتردية والنطيحة!!

متابعة سزيفت نيوز:

كيف قضت الزوجة ليلة رومانسية في زريبة الغنم وخرب عليها التيس الليلة  وانتهت الحكاية باطلاق لفطة”النطيحةًاوالمتردية” على الزوجين العروسين اقرؤوا القصة الواقعية المضحكة بلهجة صاحبتها..

وحده تحكي وتقول :
بنقل لكم موقف صار لابوي وامي ايام زواجهم  .. بقولها لكم مثل ماحكتها امي لنا ..
تقول : تزوجنا ايام الغزو العراقي للكويت وابوكم ماجلس معي الا اسبوع وطلبوه للحرب لانه في الحرس الوطني، عروس وشهر العسل اللي يقولونه صار اسبوع،
كتب وصيته وقال لاتفتحونها الا اذا مت، وانا توني صغيره يوم اخذته ولا عرفته زين، انتقلت كل العائله لمزرعة جدي وجده، طبعا هو ولد عمي، تخيلو سبع عوائل في مزرعه وحده، في كل زاويه اربعه خمسه وزحمه وحوسه وانا كل تفكيري بزوجي متى يجي ؟
والمزرعه بعيده عن المدينه
بعد اربع شهور جا زوجي عطوه اجازه يومين..
ومامعه الا وقت قليل ويرجع لدوامه حاول يشوفني وحاولت اشوفه واجلس معه ماقدرنا كل المزرعه يراقبونا !
ومافيه مكان، لازم اقابله وسط الرجال والا يقابلني وسط الحريم، جاتني اختي الصغيره ومعها ورقه قالت هذي من زوجك، واخذها واروح ابي اقراها ابي اعرف وش مكتوب فيها،
اول مافتحتها الا كاتب قابليني في حوش الغنم الساعه عشر..غنم يالظالم!
ماعليه ماعليه حرب والعالم قايمه قاعده وادور له عذر!

وقاعده احسب الدقايق والساعات لين جات الساعه عشر، وتسحب من بينهم لين وصلت حوش الغنم، وادخله والقى الحب ينتظرنيوقفنا مقابلين بعض عيوني في عيونه، مستحيه منه ومشتاقه له، صح ظلام بس النور الي يجينا كافي، شوي ماحسيت الا انا طايره وزاحفه على وجهي،
جاني يركض زوجي وشوي ماحسيت الا وهو يصرخ ومتمدد جنبي، ونلتفت وسط الحوش الا تيس جدي مايخلي احد ماينطحه ، وهو يركض ورانا وينطحنا🐏🐏

بنتدارك الوضع لاننفضح، ما امداني اقوم الا وينطحني في راسي!
واعطيهم ذيك الصيحه إلا وصافرات الانذارإشتغلت والمزرعه كلها قامت على صراخي وجدي جاي يركض وميت ضحك! عرف ان التيس رثع فينا لا اعاده الله من لقاء رومنسي،
زوجي قام وقضب الباب بيروح لدوامه، وانا من الدوخه اللي في راسي والحياء أبا ادخل البيت، ضيعت الدرب وصرت ألحقه وهو يقول إنقلعي وراك لاتلحقيني !وانا اقول الدرب وين، وصرنا على لسان كل اللي في المزرعه، والمزارع المجاوره، وهو غسل يده مني مارجع الابعد ما انتهت الحرب! وانا كل يوم اسمع صوت التيس وادعي عليه، الله لايوفقه مثل ما خرب ليلتنا الرومانسيه. لا..وسمونا انا وزوجي “المتردية و النطيحة” !!