“بالعامي الفصيح”.. حديث المنجا في مشوار لسوق السمك!!
متابعة سمية الشريف
قصه قصيره ننقلها على لسان بطلتها وسنقلها لكم بلهجتها بالعامي لكنها عامي فصيح.. على النحو التالي:
كنت نازلة مشوار كدة الصبح بدرى وبعد ما خلصت لقيت نفسى قريبة من سوق السمك الى عند قصر الثقافة قولت لنفسي اما اجيب سمك بلمرة مدام انا قدامو
المهم دخلت لقيت الاسعار حلوة قوى كيلو البورى الحلو ب ٢٥ قولت في سري ماشاء الله الاسعار جميلة قوى والحاجة رخيصة النهاردة وانا بشترى لقيت واحدة ست واقفة جمبي بتشترى شبار الكيلو منو ب ١٠ جنية وهى عمالة تفاصل مع الراجل عايزة تاخدو ب ٨ جنية انا استغربت بصراحة هى شكل لبسها مش وحش يعنى معقول عمالة تناهد كل دا عشان ٢جنية والراجل مش عايز ينزلهم ابدا عمال يقولها دى تسعيرة يا مدام وهى تقولو بس عشان اشوى بيهم . المهم انا حاجة جوايا خلتنى اقول للراجل اوزنلها كيلو على حسابي قولت في نفسي يعنى ١٠ جنية مش موضوع دا احنا بنجيب لعيالنا مش اقل من ٣٠ او جنية حلويات فى اليوم الست بقي مكنتش راضية ابدا قعدت تقولى يا بنتى انا معايا فلوس والله وكانت مصرة تدينى العشرة جنية بس انا اقنعتها في الاخر انى زى بنتها ودى حاجة بسيطة وبعدين دخلت انا وهى نشوى السمك لقتها بتقول للراجل حاسب على سمكى وسمك القمر دى (تقصد سمكى) قولتلها لية كدة يا طنط قالتلى مش انتى قولتى انك زى بنتى خلاص بقة فقولت ماشى مرضتش ازعلها عشان محرجهاش برضو جيت بعد كدة رحت اجيب منجا الراجل عندة منجا ب ١٣ وب ١٠ وب ٤ جنية الى هى نصها بايظ ونصها حلو دى انا وقفت عن المنجا الى بعشرة وقلتلو هاتلى ٢ كيلو ولقيت الست الطيبة دى بتقول للراجل براحة كدة ينفع اخد نص كيلو وبتشاور على المنجا الى ب ٤ جنية قالها ماشي فمسكت المنجا بتقلب فيها قام الراجل شاخط فيها وقالها هو نص كيلو بتنقي في اية قامت قالتلو معلش انا عايزة بس وحداية لابنى اصلو جاى يزورنى النهاردة كان في ست واقفة معانا بتجيب منجا من الى ب ١٣ فسألتها هو ابنك مسافر فردت الست قالتلها لا هو عايش مع ابوه اصل ابوه مطلقنى من ١٤ سنة واخد منى الواد والبت وقامت معيطا ومش هقولكم بقة على كمية القهر الى كانت باينة في كلامها والحزن الى في عنيها وكملن كلامها بان الواد طيب وحنين كل فترة بيجى يزورها لكن البت مبتجليش خالص نفسي اشوفها فلست الى واقفة معانا قالتلها طيب وانتى مش بتروحلها ليه قالتلها لالالالالالا بقهر كدة اصلو متجوز ولما بروح اطلب اشوف عيالى بيضربنى فلشارع ويبهدلنى فبطلت اروح وسكتت شويا وبعدين قالت بس البت غلبانة غصب عنها اخدها منى وهى حتت لحمة حمرا ومراتو هى الى ربتها عشان كدة متعرفنيش قوى وقعدت تدعى لعيالها لقيت الست بقة الى كانت واقفة معانا قالت للراجل اوزنلها ٢ كيلو وشاورت على المنجا الى ب ١٣ و راحت العربية بتاعتها جابت فلوس وادتهالها انا معرفش كام بس الست الغلبانة قعدت تعيط قوى ولقيت بتاع الفاكهة قام حاطط كام جوافايا وعنقود عنب فلكيس وقالها ودول منى لابنك
معرفش لية انا حسيت ان ربنا واقف مع الست دى ورزقها برزق ابنها النهاردة
هى في وسط الكلام قالت انها سابت العيال لابوهم عشان مكنش معاها تاكلهم عيش حاف بس ملخص الحكاية ان ربك مبيسبش حد وبيرزق كل واحد برزقو وحاجة تانية كمان
انا روحت وانا طول الطريق عمالة احمد ربنا واشكره على نعمو عليا بلرغم انى كنت شايفة السمك رخيص قوى النهاردة في ناس تانية مكنش معاها تمنو
الحمد الله على كل شئ.
